ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ 18-ՐԴ ՀԱՄԱԳՈՒՄԱՐԻ ՊԱՇՏՕՆԱԿԱՆ ՅԱՅՏԱՐԱՐՈՒԹԻՒՆ

ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ 18-ՐԴ ՀԱՄԱԳՈՒՄԱՐԻ ՊԱՇՏՕՆԱԿԱՆ ՅԱՅՏԱՐԱՐՈՒԹԻՒՆ

Նոյեմբերի վերջերուն Կիպրոսի Լարնագա քաղաքին մէջ կայացաւ Սոցիալ Դեմոկրատ Հնչակեան Կուսակցութեան 18-րդ համագումարը:    Շրջանաւարտ Կեդրոնական Վարչութեան կողքին, համագումարին ներկայ էին 12 կուսակցական շրջաններ ներկայացնող 52 պատգամաւորներ:

Համագումարը  ընթացաւ  Կուսակցութեան  ներքին  միասնականութիւնը եւ համերաշխութիւնը ամրապնդող  մթնոլորտի մը մէջ ու վերահաստատեց իր  յանձնառութիւնը`  Հայ ժողովուրդի բոլոր իղձերու իրականացման ճամբուն վրայ օգտագործելու իր ամբողջ ներուժը:

Հայկական Ցեղասպանութեան 90-ամեակին առթիւ Համագումարը խոնարհելով մեր ազգի բիւրաւոր նահատակներու խնկելի յիշատակին առջեւ, յայտնեց իր երախտագիտութիւնը արաբական հիւրընկալ երկիրներուն ու անոնց ժողովուրդներուն, որոնք օգնութեան ձեռք մեկնեցին Եղեռնէն վերապրող հայութեան: Նաեւ` ողջունեց աշխարհի բոլոր այն պետութիւնները որոնք պաշտօնապէս ճանչցան Հայկական Ցեղասպանութիւնը, իսկ իր քննադատութիւնը  արձանագրեց  Ամերիկայի Միացեալ Նահանգներու եւ Մեծն Բրիտանիոյ կառավարութեանց վերաբերմունքին նկատմամբ,  որոնք քաղաքական կողմնակի հաշիւներէ  մեկնած տակաւին կը մերժեն  ընդունիլ Ցեղասպանութեան փաստի իրողութիւնը:

Համագումարը  իր աշխատանքային նիստերու ընթացքին  քննեց Կուսակցութեան առջեւ ծառացող բազմաթիւ խնդիրներ` կազմակերպչական, տնտեսական եւ քաղաքական մարզերէ ներս, որոնց նկատմամբ առաւ համապատասխան որոշումներ, որոնք յառաջիկայ օրերուն գործադրութեան պիտի դրուին նորընտիր Կեդրոնական Վարչութեան կողմէ:

Կազմակերպչական գետնի վրայ Համագումարը հաստատեց, որ  իրեն համար  գլխաւոր նպատակակէտ կը մնայ Կեդրոնական Վարչութիւնը վերջնականապէս Հայաստան տեղափոխելու հարցը:  Այս նպատակին հասնելու համար որոշուեցաւ, այսուհետեւ Կուսակցութեան համագումարները կայացնել քաղաքամայր Երեւանի մէջ ու ամենէն կարճ միջոցին հոն ստեղծել Կուսակցութեան կեդրոնական գրասենեակ:

2007 թուականը կը հանդիսանայ Հայ ժողովուրդի ծոցէն ծնունդ առած առաջին քաղաքական-յեղափոխական կուսակցութեան` Հնչակեան մայր  Կուսակցութեան 120 ամեակը: Այս առթիւ  որոշուեցաւ  արժանավայել    ձեւով ու բազմաբնոյթ միջոցառումներով  նշել  պատմական այդ  թուականը` Հայրենիքի եւ սփիւռքի տարածքին:

Երկար եւ լուրջ քննարկումներէ ետք Համագումարը   եկաւ ճշդելու Կուսակցութեան դիրքորոշումները Հայ ժողովուրդի ու հայաստանի դիմագրաւած այլազան հարցերուն շուրջ:

Համագումարը կեցուածքներ ճշդեց , Հայ-Թուրք յարաբերութիւններու, Հայ Դատի, Ազգապահպանման, Արցախի հարցի, Ջաւախքի հարցի, եկեղեցական տագնապի,  Հայաստանի ներկայ իրավիճակի  եւ այլ հարցերու շուրջ:

Խոր քննարկման առարկայ դարձաւ Հայ-թրքական յարաբերութիւններու ներկայ հանգրուանը: Պատգամաւորներու արտայայտած տեսակէտներու ամփոփումով, Համագումարը այդ յարաբերութիւններու գծով եկաւ այն եզրակացութեան, որ պէտք է Հայ-Թուրք  ոչ  պաշտօնական  մակարդակներու վրայ  երկխօսութիւնը ծառայէ Ցեղասպանութեան ճանաչման եւ Թուրքիոյ հանրային կարծիքը այդ ուղղութեամբ զարգացնելուն: Իսկ, Հայ-Թուրք պաշտօնական երկխօսութիւնը պէտք է պայմանաւորել Ցեղասպանութեան ճանաչումով:

Համագումարը  վերահաստատեց Հայ Դատի եւ  հողային պահանջատիրութեան  Ս.Դ.Հնչակեան Կուսակցութեան աւանդական դիրքորոշումը:

Ինչ կը վերաբերի Թուրքիոյ Եւրամիութեան անդամակցութեան հարցին,  Համագումարը գտաւ որ այդ պէտք է պայմանաւորուի նաեւ Հայկական Ցեղասպանութեան ճանաչմամբ, Հայաստանի շրջափակումի վերացմամբ եւ  Կիպրոսէն  թրքական  ներխուժող բանակի հեռացմամբ:

Ինչպէս նախորդ Համագումարին  այս անգամ եւս  Ս.Դ.Հնչակեան Կուսակցութիւնը   Ղարաբաղի հարցի լուծման   հիմքը    նկատեց ազգերու ազատ  ինքնորոշման  սկզբունքը:  Ս.Դ.Հնչակեան Կուսակցութիւնը ընդունելի կը գտնէ Հայաստանի հետ Լեռնային Ղարաբաղի միացումը կամ անոր անկախ կարգավիճակի ընդունումը: Բանակցութիւններու ընթացքին Հայաստանին պատկանող որեւէ տարածք սակարկութեան եւ փոխանակման առարկայ չի կրնար ըլլալ ոչ որպէս հողամաս ոչ ալ որպէս “անցք” կամ “Ճանապարհ”: Արցախի հարցի  կարգաւորման որեւէ համաձայնագիր պէտք է կրէ Արցախի օրինական իշխանութիւններուն ստորագրութիւնը եւ հանրաքուէի միջոցաւ արժանանայ Արցախի բնակչութեան հաւանութեան:

Ս.Դ.Հ.Կ. 18-րդ Համագումարը քննելէ ետք Ջաւախքահայութեան իրավիճակը, գտաւ թէ անոր ընկերային, տնտեսական, կենցաղային թէ կրթական պահանջքները արդար են   ու իրաւացի: Այդ պահանջները պէտք է դառնան համազգային խնդիր: Ս.Դ.Հ.Կ.-ն այս հանգրուանին դէմ է Ջաւախքահայութեան ընկերային պահանջներու քաղաքականացման, այդ գտնելով խիստ արկածախնդրական եւ վտանգաւոր:

18-րդ Համագումարը հանգամանալից կերպով քննարկելէ ետք Հայ ժողովուրդի պատմութեան յառաջիկայ հանգրուանին իր ունենալիք դերակատարութիւնը գտաւ, որ հայրենակերտումը եւ հայրենիքի շուրջ համախմբումը կը մնան Կուսակցութեան գլխաւոր առաջադրանքները: Այս նպատակով առաւել ուշադրութիւն պիտի կեդրոնացուի հայապահպանման, ազգային, կրթական, մշակութային եւ Հայ Դատի հետապնդման իր լծակներուն` ամրապնդելով  ու ընդլայնելով անոնց խարիսխները:

Համագումարը արձանագրեց որ, յետ եղեռնեան սփիւռքի առաջին հանգրուանին ծնունդ առած ու 1956 թուականին իր գագաթնակէտին հասած Հայ Եկեղեցւոյ տագնապին ձգած ժխտական ազդեցութիւնը Հայ կեանքէն ներս, տակաւին կը  յամենայ, հակառակ տեղի ունեցած քաղաքական բարերար շրջադարձերուն: Հնչակեան Կուսակցութիւնը կը վերահաստատէ իր այն տեսակէտը, թէ Հայ կեանքէն ներս իրենց ազգային-հոգեւոր առաքելութիւնը  լաւագոյնս շարունակելու համար, Հայ կրօնական կեդրոնները պէտք է գործեն ապակուսակցական եւ ապաքաղաքական պայմաններու մէջ:

18-րդ Համագումարը  բնականաբար  երկար  կեդրոնացաւ  Հայաստանի մէջ  տիրող  ներկայ կացութեան վրայ: Արձանագրելէ ետք որ ընկերային վիճակին վրայ իրենց ժխտական անդրադարձը կ’ունենան կաշառակերութիւնը, տնտեսական  մաֆիաները,  իրաւապահ  մարմիններուն հանդէպ  անվստահութիւնը, որոնց  վերացման համար իշխանութիւնները  ոչ մէկ լուրջ  նախաձեռնութիւն  հանդէս կը բերեն,  տիրող պայմաններու բարելաւման  եւ քաղաքական իրավիճակի փոփոխութեան հասնելու նպատակով, շեշտեց  ընդդիմադիր  դաշտի վրայ  գործելու կարեւորութիւնը:

Հիմնուելով  Ս.Դ.Հ.Կ.-ի   ընկերվարական եւ դեմոկրատական գաղափարախօսութեան վրայ, Համագումարը  գտաւ որ  այս հանգրուանին Կուսակցութեան  համար կարեւորագոյն առաջադրանք  է  իր առաքելութեան  մաս   կազմող պայքարը` յանուն Հայաստանի մէջ իրաւ ժողովրդավարութեան  հաստատման:  Հնչակեան Կուսակցութիւնը կը հաւատայ, որ Հայաստանի մէջ  կարելի չէ   տնտեսական ու  ընկերային  արդարութեան  հասնիլ առանց ժողովրդավարութեան, որուն  հիմնաքարը  կը հանդիսանայ ազատ եւ արդար ընտրութիւններու միջոցաւ իշխանութեան հերթափոխութիւնը:

Ս.Դ.Հնչակեան Կուսակցութիւնը Հայ ժողովուրդի  ու Հայաստանի   ապագային նկատմամբ   հաւատքով եզրափակեց իր 18-րդ Համագումարը:

 

Ս.Դ.ՀՆՉԱԿԵԱՆ ԿՈՒՍԱԿՑՈՒԹԵԱՆ

18-ՐԴ ՀԱՄԱԳՈՒՄԱՐ

CONTACT US

We're not around right now. But you can send us an email and we'll get back to you, asap.

Sending

©2020 SDHP

Log in with your credentials

Forgot your details?