ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ 19-ՐԴ ՀԱՄԱԳՈՒՄԱՐԻ ՊԱՇՏՕՆԱԿԱՆ ՅԱՅՏԱՐԱՐՈՒԹԻՒՆ

ՍՈՑԻԱԼ ԴԵՄՈԿՐԱՏ ՀՆՉԱԿԵԱՆ ԿՈՒՍԱԿՑՈՒԹԵԱՆ 19-ՐԴ ՀԱՄԱԳՈՒՄԱՐԻ ՊԱՇՏՕՆԱԿԱՆ ՅԱՅՏԱՐԱՐՈՒԹԻՒՆ

Սեպտեմբերի 26-էն 29-ը Հայաստանի մէջ կայացաւ Սոցիալ Դեմոկրատ  Հնչակեան  Կուսակցութեան  հերթական  19-րդ Համագումարը, որուն կը մասնակցէին Հայաստանի եւ Սփիւռքի հայաշատ տարբեր քաղաքներէն ժամանած պատուիրակներ:

Համագումարը քննարկման առարկայ դարձուց հայ ժողովուրդը յուզող հիմնական խնդիրները` հայ-թրքական յարաբերութիւնները, Արցախեան  հիմնահարցի  վերջին  զարգացումները, ջաւախքահայութեան առջեւ  ծառացած դժուարութիւնները, Հայաստանի ներքին քաղաքական, տնտեսական   եւ  ընկերային կեանքը, ինչպէս նաեւ Հայաստանի եւ Սփիւռքի կուսակցութեան կառոյցներուն առնչուող հարցեր:

Համագումարն ընդգծեց, որ Հայաստանի Հանրապետութիւնը Թուրքիոյ հետ յարաբերութիւններ հաստատելով չի կրնար անտեսել պատմութեան դառն փորձը: Մեկնելով այս իրողութիւնէն` ՍԴՀԿ-ը  կը մերժէ Թուրքիոյ հետ ներկայ սահմանները ընդունող որեւէ արձանագրութիւն, կը  մերժէ  թրքական   ժխտողական  պատմագրութեան ներկայացուցիչներու հետ հայ եւ թուրք պատմաբաններէն բաղկացած ցանկացած յանձնաժողով: Հետեւաբար, Հայաստան-Թուրքիա միջպետական յարաբերութիւններու նախաքայլը պէտք է ըլլայ պատմութեան  առջեւ  իր անցեալի պատասխանատուութիւնը ստանձնելու Թուրքիոյ  պատրաստակամութիւնը:

Սփիւռքը հետեւանք  է  թրքական  իշխանութիւններու ծրագրած եւ գործադրած ցեղասպանութեան: Հետեւաբար, համայն հայութիւնը կը մնայ պահանջատէրի  իր  դերին մէջ  ու շարունակելու է հետապնդել հայոց ցեղասպանութեան ճանաչումը եւ իր իրաւունքներու պաշտպանութիւնը`  անկախ  այն  բանէն,  թէ  ի±նչպիսի  յարաբերութիւններ կը զարգանան Հայաստանի եւ Թուրքիոյ միջեւ:

Քննարկելով Լեռնային Ղարաբաղի հակամարտութեան կարգաւորման գործընթացը` ՍԴՀԿ 19-րդ համագումարը վերահաստատեց, որ Լեռնային Ղարաբաղի հարցը պէտք է լուծուի ազգերու ազատ ինքնորոշման իրաւունքի միջազգային սկզբունքի համաձայն:  Համագումարը  անընդունելի  կը  համարէ մեզ պարտադրուող Մատրիտեան սկզբունքները, որոնք կ’ենթադրեն միակողմանի զիջումներ հայկական  կողմէն: Համագումարը կը համարէ, որ Արցախի համար ոչ նպաստաւոր այս առաջարկները հետեւանք են բանակցային գործընթացէն Լեռնային Ղարաբաղի Հանրապետութեան դուրս մղման:

Համագումարը կը դիմէ միջազգային ընտանիքին` ճանաչելու Արցախի անկախութիւնը գոյութիւն ունեցող տարածքի վրայ, ինչոր հաստատուած է ԼՂՀ-ի մէջ անցկացուած հանրաքուէի արդիւնքով:

Համագումարն  արձանագրեց լուրջ մտահոգութիւն Ջաւախքի մէջ ստեղծուած իրավիճակի կապակցութեամբ: Վրացական իշխանութիւններու  վարած ազգայնամոլ քաղաքականութիւնը դրսեւորուած է հայ բնակչութեան քաղաքացիական իրաւունքներու ոտնահարմամբ: Ջաւախքի մէջ  հետեւողականօրէն կ’արգելափակուին հայութեան ազգային համախմբման  ուղղուած բոլոր ճիգերն ու քայլերը:

ՍԴՀԿ-ը կը դատապարտէ վրացական իշխանութիւններու հակահայ քաղաքականութիւնը եւ զօրավիգ կը կանգնի ջաւախքահայութեան իրաւունքներուն:

Քննարկելով Հայաստանի ներկայ քաղաքական իրավիճակը, համագումարը արձանագրեց, որ Հայաստան այժմ կը գտնուի ժողովրդավարութեան  միջազգային  չափանիշներէն  հեռու: Հայաստանի մէջ այսօր առկայ  են  օրինականութեան, մարդու  իրաւունքներու, խօսքի ազատութեան, սոցիալական արդարութեան եւ ազատ մրցակցութեան սկզբունքներու լուրջ ոտնահարումներ: Հնչակեան կուսակցութիւնը համոզուած է, որ վերոնշեալ խնդիրները կարելի է լուծել միայն հասարակութեան վստահութիւնը վայելող իշխանութեան միջոցով:

Այսպէսով‘ համագումարը վճռեց, որ ՍԴՀԿ-ը Հայաստանի մէջ պիտի շարունակէ ձգտիլ վերականգնելու ժողովրդավարութիւնը, օրինականութիւնը եւ սահմանադրական կարգը:

ՍԴՀԿ-ը հայ հասարակութեան  պիտի շարունակէ ներկայացնել սոցիալ-դեմոկրատական արժէքային  դրոյթները, գտնելով, որ Հայաստանը համակարգային ճգնաժամէն հանելու միակ ելքը այդ է:

ՍԴՀԿ-ի  համագումարը քննարկեց  եւ որոշումներ կայացուց Սփիւռքի Հնչակեան կառոյցներու հզօրացման, հայապահպանման, Հայ Դատի հետապնդման, հայ Առաքելական Եկեղեցւոյ իրավիճակի եւ Հայաստան-Սփիւռք կապերու ամրապնդման եւ այլ հարցերու կապակցութեամբ:

 

Սոցիալ Դեմոկրատ Հնչակեան Կուսակցութեան 19-րդ համագումար

Ք. Երեւան, 30.09.2009

CONTACT US

We're not around right now. But you can send us an email and we'll get back to you, asap.

Sending

©2020 SDHP

Log in with your credentials

Forgot your details?