ՀԱՅ-ԹՈՒՐՔ ՅԱՐԱԲԵՐՈՒԹԵԱՆ ՆՈՐ ԶԱՐԳԱՑՈՒՄՆԵՐ

armenia-turkey

Հինգշաբթի, 7 Նոյեմբեր 2013-ին, Պոլսոյ մէջ «Կանաչներ եւ Ձախ Ապագայ» կուսակցութեան մէկ յանձնախումբը ժողով մը գումարած է մասնակցութեամբ տարբեր կազմակերպութիւն­ներու եւ անհատներու, որոնք ճանչցած են Հայոց Ցեղասպանութիւնը, «Պատմութեան Հետ Առերեսում» վերնագրին տակ, քննարկելու մինչեւ 2015 թուականը Հայոց Ցեղասպանութեան 100-ամեակին առթիւ տարուելիք աշխատանքներն ու ձեռնարկները: Այս ժողովին մասնակ­ցելու հրաւէր ստացաւ Ս. Դ. Հ. Կուսակցութիւնը:

Այս ուղղութեամբ, ՍԴՀԿ Կեդրոնական Վարչութեան արտաքին յարաբերութիւններու մար­մինը ժողովականներուն յղեց հետեւեալ նամակը.

«Յարգելի բարեկամներ,

Իմացանք որ Պոլսոյ մէջ տեղի պիտի ունենայ «Պատմութեան Հետ Առերեսում» վերնագրին տակ ժողով մը, կազմակերպութեամբ “Կանաչներ եւ Ձախ Ապագայ» կուսակցութեան:

Այս առիթով մեր կածիքը այն է, որ պատմական դէպքերը մոռացութեան մատնելը կամ զանոնք չճանչնալ ձեւացնելը սխալ բաներ են: Պատմութեան պէտք է նայիլ բաց աչքերով:  Մեր ընդհանուր պատմութեան մէջ ամենամեծ ցաւ պատճառած աղէտներէն է Հայոց Ցեղաս­պանութիւնը, որուն հարիւրամեակին սեմին ենք այսօր:

Դատապարտել եւ ընդունիլ սեփական սխալը, զայն լսելի դարձնել հանրութեան՝ յարիր է միայն համամարդկային բարձր գիտակցութեամբ օժտուած մարդոց:

Այս ելակէտէն մեկնած, «Պատմութեան Հետ Առերեսում» վերնագրին տակ գումարուող ժողո­վը, եւ անոր որոշելիք ձեռնարկները, մուտք մըն են դէպի անցեալի սխալները չկրկնելու, ժո­ղո­վուրդներու բարեկամութեան եւ տարածաշրջանին մէջ արդարութիւն եւ խաղաղութիւն  հիմնելու նպատակին:

Մենք ձեռք կը մեկնենք Ձեզի եւ կ’ողջունենք Ձեր նախաձեռնութիւնները՝ համագործակցու­թեան մաղթանքներով»:

Ժողովի աւարտին որոշուած է տարբեր ձախ կուսակցութիւններ ընդգրկող Ժողովուրդներու Ժողովրդավարական Կուսակցութեան (HDP) մասնակցութեամբ ընդլայնուած ժողով մը գու­մարել եւ աւելի զարգացնել աշխատանքներու ծաւալը:

Միտքեր յայտնուած են Հայաստանի մէջ մասնակցելու Ցեղասպանութեան նուիրուած միջոցառումներուն, իսկ Գերմանիոյ մէջ ձախակողմեան թուրքերու հետ Ցեղասպանութեան ճանաչման եւ ոգեկոչման ուղղութեամբ աշխա­տանք­ներ տանիլ:

Իմացանք նաեւ որ Նոյեմբերի 30-ին «Կանաչներ եւ Ձախ Ապագայ» կուսակցութեան համա­գու­մարը տեղի պիտի ունենայ Անգարայի մէջ, որուն հրաւիրուած է ՍԴՀԿ-ը:

Յիշեցնենք որ այս տարուան Յունիսին Պոլսոյ մէջ տեղի ունեցած 20-ներու ոգեկոչման ձեռ­նարկներուն իր զգալի մասնակցութիւնը բերած էր «Կանաչներ եւ Ձախ Ապագայ» կուսակ­ցութիւնը:

 

 ՍԴՀԿ Մամլոյ եւ Տեղեկատուութեան Դիւանը կը հաղորդէ

0 Comments

Leave a reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

CONTACT US

We're not around right now. But you can send us an email and we'll get back to you, asap.

Sending

©2017 SDHP

Log in with your credentials

Forgot your details?