ՍԴՀԿ Կեդրոնական Վարչութեան Ատենապետ Ընկ. Յակոբ Տիգրանեանի Խօսքը Հայաստան- Սփիւռք 5–րդ Համաժողովին

Յարգարժան Վարչապետ Հայաստանի Հանրապետութեան՝ Պրն. Յովիկ Աբրահամեան

Մեծարգոյ Սփիւռքի նախարարուհի՝ Հրանուշ Յակոբեան,

Յարգելի պետական այրեր և տիկնայք, քաղաքական եւ յարանուանական  համայնքներու  պատկառելի ներկայացուցիչներ,

Սոցիալ Դեմոկրատ Հնչակեան կուսակցութեան անունով կ’ողջունեմ Հայաստան- Սփիւռք 5-րդ համաժողովի բոլոր մասնակիցներուն և լիայոյս եմ, որ այս կարևոր մէկտեղումը կ’ըլլայ նպատակային և արդիւնաւէտ:

Իսկապէս համաշխարհային ծանր տագնապներու մթնոլորտի մէջ է, որ կը գումարուի այս համաժողովը: Արաբական գարունով սկիզբ առած աշխարհաքաղաքական խորքային փոփոխութիւններու ալիքը արդէն հասած է Եւրոպա և կարծէք պատմութեան անիւը համառօրէն կը փորձէ ետ շրջիլ դէպի սառը պատերազմի ուղղութեամբ վերակենդանացնելով Արևելք-Արևմուտք հակամարտութիւնը: Այս բոլոր երեւոյթները նոր մարտահրաւէրներու և ինչու չէ նաև վտանգներու առաջ կը դնեն մեզ Հայաստանէն մինչև Սփիւռք, յատկապէս միջին արևելքի հայ գաղութներու լինելիութեան տէսակէտով:

Այդ առումով, Հայաստան-Արցախ-Սփիւռք կապերու առաւել ամրապնդումն ու սերտ համագործակցութիւնը կը դառնան ա’լ աւելի կենսական և այժմէական:

Ի հարկ է, չենք կրնար ակնկալել, որ մէկ հաժողովով կարելի պիտի ըլլայ լուծում տալ մեր դիմագրաւած բոլոր հարցերուն, բայց կը յուսանք, որ այս համաժողովէն դուրս կուգանք գործնական ծրագրով մը, որ կ’ունենայ շարունակական ընթացք և կուտայ շօշափելի արդիւնքներ: Կը կարեւորենք այս հանգամանքը, նախ նկատի ունենալով հարցերու հրատապութիւնը, մանաւանդ օրակարգի 4-րդ հարցի առումով և ելլելով նախորդ չորս համաժողովներու փորձառութենէն, ուր առնուած որոշումներն ու ծրագիրները մեծ մասամբ մնացին թուղթի վրայ և անկատար:

Սոցիալ Դեմոկրատ Հնչակեան կուսակցութեան անունով կ’ուզենք ընդգծել հետեւեալ կէտերը, որոնք կ’առընչուին օրակարգի բոլոր հարցերուն-

Ա. Ստեղծել Հայաստան-Սփիւռք յարաբերութիւնները կարգաւորող և համազգային կարևորագոյն հարցերու վերաբերեալ ռազմավարութիւն մշակող մշտական մարմին մը:   Օրինակ այդ մարմնի պարտականութիւնը պէտք է ըլլայ մշակել հայ դատի հետապնդման ընդհանուր ռազմավարութիւն ուր պէտք է, Հայաստանի  եւ  Սփիւռքի դերերու յստակ բաժանում կատարուի  եւ  անպայման հաշուի առնուին Հայաստանի պետական շահերը և Սփիւռքի ակնկալութիւնները:

Բ.  Ցեղասպանութեան 100-ամեակի նշման զուգահեռ պատրաստել հատուցման իրաւական եւ ամբողջական թղթածրար եւ այդ առումով ազդեցիկ  երկիրներու հետ  համապատասխան աշխատանք տանիլ:

Գ.   Հայաստանի Հանրապետութեան մէջ ապաստանած Սուրիահայերու հիմնախնդրի քննարկման ընթացքին անդրադառնալ և մշակել տարբերակային ծրագիր (contingency plan) սուրիաբնակ, մանաւանդ հայահոծ շրջաններու մէջ այսինքն Հալէպ և Դամասկոս,  մեր հայրենակիցներուն՝ ի պահանջել հարկին ապահով դուրս բերման և մայր հայրենիք վերաբնակեցման վերաբերեալ:

Դ. Արցախի Անկախ հանրապետութեան միջազգային ճանաչման գործընթացը վերածել առաջնահերթութեան:

Բարի երթ Հայաստան- Սփիւռք  5–րդ Համաժողովին:

0 Comments

Leave a reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

CONTACT US

We're not around right now. But you can send us an email and we'll get back to you, asap.

Sending

©2017 SDHP

Log in with your credentials

Forgot your details?