Ընկ. Յակոբ Տիգրանեան:- «Ապրիլ 24-ը Հեռու Պահենք Ներքաղաքական Հարցերէն»

Ուրբաթ, 6 Փետրուար 2015-ին կուսակցութեան Երեւանի կեդրոնատեղիին մէջ ՍԴՀԿ Կեդրոնական Վարչութեան ատեապետ Ընկ. Յակոբ Տիգրանեան հրաւիրած էր մամլոյ ասուլիսի մը: Ատենապետ ընկերը հանդէս եկաւ հակիրճ խօսքով եւ ներկայացուց կուսակցութեան Հայաստանակեդրոն ըլլալու առած նախկին որոշումները եւ վերջերս կեդրոնական գրասենեակին Երեւան հաստատուելու հանգամանքները:

Այս առումով Ընկ. Յակոբ Տիգրանեան ըսաւ. «Հնչակեան կուսակցութեան 2009 թուականին տեղի ունեցած 19-րդ համագումարը որոշում կայացուց դառնալ Հայաստանակեդրոն: 4 տարի ետք 20-րդ համագումարի ընթացքին` 2013-ի Սեպտեմբերին, այդ որոշումը վերահաստատուեցաւ: Անկէ ետք, նորընտիր կեդրոնական վարչութիւնը ուժի մէջ դնելով նախօրօք առնուած որոշումը` Սփիւռքէն Հայաստան տեղափոխեց Սոցիալ Դեմոկրատ Հնչակեան Կուսակցութեան կեդրոնը: Այսօր արդէն իրականութիւն դարձած է այդ որոշումը, մեր կեդրոնը օժտո ւած է Երեւանի մեջ իր
գրասենեակով եւ ես` որպէս ատենապետ, կուսակցութեանս խոնարհ ծառան, տեղափոխուած եմ Հայաստան»:

Ընկ. Տիգրանեան, հայրենի մամուլն ու լրատուական միջոցները իրազեկելու համար կուսակցութեան ընդհանուր կազմակերպչական մարմիններուն մասին, մանրամասնօրէն ներկայացուց այսօր աշխարհով մէկ սփռուած Հնչակեան կուսակցութեան ունեցած կեդրոններն ու մշակութային, երիտասարդական, կրթական-բարեսիրական եւ Հայ Դատի գործունէութիւն ծաւալող միաւորներուն մասին ամփոփ տեղեկութիւններ:

Ապա ընկեր ատենապետը ներկայացուց այն բոլոր հանգամանքները, որոնք խթան հանդիսացան, որ Հնչակեան կուսակցութիւնը դառնայ Հայաստանակեդրոն եւ իր կեդրոնական գրասենեակը տեղափոխէ Երեւան: Ընկերը այս առումով դիտել տուաւ, որ «անկախութեան համար պայքարած եւ տուած ենք հազարաւոր նահատակներ այդ զոհասեղանին, կը կարծեմ, որ ճիշդ չէր հայ ժողովուրդի պատմութեան առաջին քաղաքական կուսակցութեան կենտրոնատեղին ըլլար Հայրենիքէն դուրս: Հետեւաբար, մեր տունդարձը աւելի քան հրատապ էր եւ պարտաւորեցնող: Մենք այս նախաձեռնութեամբ կ՛ուզենք վստահութիւն ներշնչել հայրենի պետականութեան հանդէպ»:

Ընկ. Տիգրանեան նաեւ կարեւորեց Սփիւռք-Հայաստան կապերու ամրացումը եւ վստահեցուց, որ Հնչակեան կուսակցութիւնը զինուած տարիներու իր փորձառութեամբ պիտի սատարէ այդ յարաբերութիւններու ամրացման եւ ուժեղացման:

Ան նաեւ ըսաւ, որ կուսակցութիւնը դրական ոգիով պիտի ներգրաւուի հայրենի քաղաքական դաշտին մէջ: Ընկերը բացատրելով Սփիւռքի եւ Հայաստանի կառոյցներուն ունեցած առաջնահերթութիւնները դիտել տուաւ, որ «Սփիւռքի մէջ կուսակցութեան գլխաւոր նպատակն է հայապահպանումը, Հայ Դատի հետապնդումը, Ցեղասպանության ճանաչումը, Արցախի Հանրապետութեան միջազգային ճանաչումը եւ Հայաստան-Սփիւռք կապերու ամրապնդումը: Իսկ Հայաստանի մէջ կուսակցութիւնը զուտ քաղաքական գործունէութիւն կը ծաւալէ»:

Ան խօսելով կուսակցութեան ապագայ ծրագիրներուն մասին ըսաւ. «Գալով կուսակցութեան ապագայ ծրագիրներուն` այսօր մենք մէկ հիմնական նպատակ ունինք, որն է` ինքնակազմակերպումը: Ընդհանուր կառոյցի ինքնակազմակերպում` քատրային, երիտասարդական, քարոզչական եւ այլն: Այս սակայն չի նշանակէր, որ ինքնակազմակերպման գործընթացի մէջ ըլլալով հանդերձ մենք քայլ պիտի չպահենք քաղաքական զարգացումներուն հետ, այլ հակառակը, ըլլալով ինքնուրոյն քաղաքական տեսակետներու տէր կուսակցութիւն, բոլոր կարեւորագոյն հարցերուն առընթեր պիտի բարձրաձայնենք մեր հիմնաւորուած տեսակէտները: Ինչպէս միշտ, քաջութիւնը պիտի ունենանք քննադատելու բացասականը եւ գնահատելու դրականը: Երբեք ու երբեք հակուած չենք ամէն ինչ «սեւցնելու» եւ կամ ալ հակառակը` յարատեւ խնկարկողի դերին մէջ ըլլալու»:

Ընկեր Տիգրանեան խօսելով Հայաստանի ներքաղաքական կեանքի առկայ իրավիճակին մասին յայտնեց.«Այսօր Հայաստանի հասարակութեան մէջ առկայ է վստահութեան պակաս ընդհանրապէս քաղաքական վերնախաւի հանդէպ: Մեր ժողովուրդը կորսնցուցած է վստահութիւնը թէ՛ իշխանութիւններու եւ թէ` ընդդիմութեան հանդէպ: Տնտեսական անմխիթար իրավիճակը, անգործութիւնը եւ յոյսի բացակայութիւնը կը ստիպեն մեր ժողովուրդը բռնել արտագաղթի ճանապարհը: Անհրաժեշտ է, որ քաղաքական ուժերը գիտակցին երկրի ու ժողովուրդի տագնապալի վիճակը: Քննադատութիւնները ըլլան ճիշդ եւ կառուցողական: Իրարու հանդէպ թշնամանք դրսեւորելու փոխարէն ըլլանք հանդուրժողական: Մենք պարտաւոր ենք քաղաքական մշակոյթը բարելաւել յօգուտ մեր պետականութեան ամրապնդման եւ մեր ժողովուրդի բարեկեցիկ ապագային»:

Կուսակցութեան ատենապետը խօսելով օրերս քննարկութեան մէջ եղող սահմանադրական փոփոխութիւններուն մասին ըսաւ. «Հնչակեան կուսակցութիւնը միշտ եղած է կողմնակից համակարգային փոփոխութիւններու: Ներկայ սամհմանադրութեամբ, իշխանութիւնը եւ պետականութիւնը դարձած են հոմանիշներ: Կը հաւատանք, որ այսօր ստեղծուած է լաւ առիթ մը, սահմանադրական փոփոխութիւններ իրականցանելու համար: Մեր կարծիքով այդ փոփոխութիւնները պէտք է ըլլան օր առաջ եւ Հայաստան անցնի խորհրդարանական համակարգի` կիրառելով Համամասնական ընտրական օրէնք»:

Ընկ. Տիգրանաեան անդրադառնալով Հայաստանին ԵՏՄ-ի անդամակցութեան` դրական համարեց այդ մէկը եւ ընդգծեց, որ Եւրասիական Տնտեսական Միու թեան Հայաստանի անդամակցութիւնը վստահաբար դրական առիթներ պիտի շնորհէ Հայրենիքին: Ընկ. Տիգրանեան խօսելով Արցախեան աշխարհի անվտանգութեան մասին ըսաւ. «Լեռնային Ղարաբաղի հարցով Հնչակեան կուսակցութիւնը կը վերահաստատէ Արցախի Հանրապետութեան ամրապնդման անհրաժեշտութիւնը եւ միեւնոյն ժամանակ անկախութեան միջազգային ճանաչման գործընթացին սատար կանգնելու մեր յանձնառութիւնը»: Աննաեւ յիշեցուց, որ այս ուղղութեամբ, Սփիւռքի շարք մը երկիրներու մէջ համագործակցաբար միւս աւանդական կառոյցներու հետ Լեռնային Ղարաբաղի Հանրապետութեան միջազգային ճանաչման սկսած գործընթացը կը շարունակուի»:

Իր խօսքի աւարտին Ընկ. Տիգրանեան անդրադարձաւ Հայոց Ցեղասպանութեան հարիւրամեակի ոգեկոչման ընդհանուր հոլովոյթին եւ ըսաւ. «Հայոց Ցեղասպանութեան 100-ամեակին ընդառաջ կ՚ողջունենք համահայկական հռչակագիրը, հաւատալով, որ հռչակագրին մէջ տեղ գտած դրոյթները պիտի դառնան համազգային ուղեցոյց մեր գալիք ռազմավարութեան: Եթէ նախորդող 100 տարիները եղան ինքնութեան պահպանման, պահանջատիրութեան եւ ցեղասպանութեան ճանաչման տարիներ, ապա այսօր մենք կը գտնուինք նոր հանգրուանի առջեւ: Այս նոր հանգրուանը պէտք է ամրագրուի արդիական մօտեցումերով, իրաւական լուրջ հիմքերու ձեւաւորումերով եւ գործելադաշտի մէջ նոր հեռանկարներու կերտումով: Արդարութեան վերականգման ճանապարհը երկար է եւ դժուարին: Այն կը պահանջէ յարատեւութիւն, վճռականութիւն եւ գերագոյն ճիգ, առավել եւս, երբ գործ ունինք կողմի մը հետ, որ ջանք չի խնայեր մեզ խոչընդոտել ամեն քայլափոխի: Անշուշտ, ցանկացած գործընթացի յաջողութեան կարեւորագոյն հրամայականը կը մնայ մեր ժողովրդի բոլոր բաղկացուցիչ տարրերու միասնական ջանքերուն մէկտեղումը»:

Ընկ. Տիգրանեան աւարտելով իր խօսքը կոչ ուղղեց հեռու մնալ առճակատումներէն եւ ըսաւ. «Կոչ կ՚ուղղեմ բոլոր քաղաքական ուժերուն հեռու մնալ ներքին առճակատումներէն եւ դադար տալ ներքին վէճերուն Ապրիլ ամսուան ընթացքին, ի յարգանս մեր միլիոնաւոր նահատակներու յիշատակին եւ որպէս ապացոյց մեր միասնականութեան»:

0 Comments

Leave a reply

Your email address will not be published. Required fields are marked *

*

CONTACT US

We're not around right now. But you can send us an email and we'll get back to you, asap.

Sending

©2020 SDHP

Log in with your credentials

Forgot your details?