Հնչակեան Քսան Կախաղաններու 100-Ամեակը Նշուեցաւ Բարձր Մակարդակով

Աւելի Քան 1400 Հայեր Ներկայ Եղան Հանդիսութեան

Կիրակի, Յունիս 14-ին, Կլէնտէլի ՚Ալեքսՙ թատերասրահէն ներս,  աւելի քան 1400 հայորդիներու ներկայութեան տեղի ունեցած, բարձր մակարդակի ու տպաւորիչ հանդիսութեան մը ընթացքին նշուեցաւ 1915 թուականի  Յունիս 15-ին, Պոլսոյ Սուլթան Պայազիտ հրապարակին վրայ կախաղան բարձրացած Հնչակեան քսան հերոսներու նահատակութեան 100-ամեակը:

ՍԴՀԿ Արեւմտեան Ամերիկայի Վարիչ Մարմինի կազմակերպութեամբ տեղի ունեցած այս միջոցառումին ներկայ էին ԱՄՆ Գոնկրէսի անդամ Ատամ Շիֆ, Կլէնտէլի քաղաքապետ Արա Նաճարեան եւ քաղաքապետական Խորհուրդի անդամները, Հայաստանի Հանրապետութեան Լոս Անճելըսի հիւպատոս Վալերի Մկրտումեան, Հայ Առաքելական, Աւետարանական եւ Կաթողիկէ եկեղեցիներու առաջնորդները, Ռամկավար Ազատական Կուսակցութեան Ատենապետը, Իրանահայ Եւ Պոլսահայ միութիւններու ներկայացուցիչները, ինչպէս նաեւ գաղութային այլ կազմակերպութիւններու ներկայացուցիչներ:

Երեկոյին ներկայ կը գտնուէր, Հայաստանէն ժամանած  ՍԴՀԿ Կեդրոնական Վարչութեան ատենապետª  Յակոբ Տիգրանեանը եւ Կեդրոնական Վարչութեան այլ անդամներ, ինչպէս նաեւª օրուայ գլխաւոր բանախօս, հայրենի հասարակական  գործիչ Սարգիս Հացպանեան:

Օրուայ հանդիսավարուհի Ընկրուհի  Ծովիկ Քէօրօղլեան նախ հրաւիրեց ներկաները յոտնկայս ունկնդրելու Ամերիկայի Միացեալ Նահանգներու, Հայաստանի Հանրապետութեան եւ Սոցիալ Դեմոկրատ Հնչակեան Կուսակցութեան քայլերգները, կատարողութեամբ մեներգչուհի Անահիտ Ներսէսեանի, դաշնակի վրայ ընկերակցութեամբ  Լեւոն Աբրահամեանի: Ապա, ներկաները լռութեամբ յարգեցին Հայոց Ցեղասպանութեան զոհª 1.5 միլիոն հայերու եւ Հնչակեան քսաններու յիշատակը:

Ծովիկ  Քէօրօղլեան  անգլերէն ու հայերէն լեզուներով իր բացման խօսքին մէջ ներկայացուց Քսան  Կախաղաններու պատմականը  ու ապա յայտարարեց ըսելով,- ՚Հեռատես Խիզախ եւ Յանձնառու,   նշանաբանով Սոցիալ Դեմոկրատ Հնչակեան  Կուսակցութիւնը կը շարունակէ իր երթը, հայկական հողերուն վրայ եւ աշխարհ չորս կողմերուն: Իբրեւ առաջին քաղաքկան եւ յեղափոխական կուսակցութիւնը, ՍԴՀԿ իր 127 տարուայ գոյութեան ընթացքին տուած է բազմաթիւ նահատակներ, որոնք պայքարած են ու ծառայած ի շահ հայութեան եւ ի շահ հայրենիքինՙ:

Եզրակացնելով հանդիսավարը ըսաւ,-՚Այսօրª վստահ ենք, որ քսան անմահներուն հոգիները քիչ մը աւելի հանգիստ կը ննջեն, ի տես այն փաստին, որ անցնող Ապրիլ 24-ին, հայ ժողովուրդը աշխարհի չորս ծագերուն միասնաբար ոգեկոչեց  Ցեղասպանութեան մեր զոհերու 100-րդ տարելիցը ու ցոյց տուաւ աշխարհին, որ ՚ոչինչ չի մոռացուել, ոչ ոք չի մոռացուելՙ:

Հայ Ամերիկեան Խորհուրդի (ՀԱԽ) խօսքը անգլերէնով փոխանցեց Վահան Խոտանեան: Ան յատկապէս ըսաւ-.՚Անցնող տասնամեակներուն Քսանները եղան ներշնչման աղբիւր հազարաւոր հայերու եւ ոչ հայերու, որոնք կը հաւատայի բոլոր ժողովուրդներու բարօրութեան: Այսօր, Հայաստանի Հանրապետութիւնը  ապրող  փաստն  է Հնչակեան քսաններու եւ այլ մտաւորականներու հետապնդած նպատակներուն: Անոնց պայքարըª պէտք է եւ պիտի շարունակուի: Հայ Ամերիկեան Խորհուրդը պիտի զօրացնէ  կապերը  թուրք  այն մտաւորականներուն հետ, որոնք կ°ընդունին Հայոց Ցեղասպանութեան փաստը եւ կողմնակից են խաղաղ գոյակցութեան: Պէտք է շարունակել պայքարը, մինչեւ որ թրքական կառավարութիւնը  ինք  եւս  միանայ այն ուժերուն, որոնք հաշտուած են իրենց երկրի պատմութեան  հետ եւ ընդունածª իրենց նախորդներու գործած մեղքերըՙ:

Ելոյթ ունեցաւ ՀԱԽ-ի ատենապետ Սեւակ Խաչատուրեան: Ան նախ յիշատակեց  Քսաններու  շառաւիղէն ընտանիքի անդամներ, որոնք ներկայ էին  սրահէն  ներս: Ապա ներկայացուց քաղաքական պաշտօնական հիւրերը: Ան յայտարարեց որ Հնչակեան մեծ մտաւորական Ստեփան Սապահ-Գիւլեանի անունով  հաստատուած առաջին  մրցանակը պիտի յանձնուի  գոնկրէսական Ատամ Շիֆին: Նախ  ցուցադրուեցան հատուածներ այն  ժապաւէնէն, ուր Ատամ Շիֆ, Ապրիլ 24-ի առթիւ, Միացեալ Նահանգներու Ներկայացուցիչ  Տան  մէջ կը կարդար Հայ նահատակներու անունները, որոնց շարքին նաեւ Քսաններուն անունները:

Գոնկրէսականը Ատամ Շիֆ յոտնկայս ծափահարութիւններով բեմ բարձրացաւ,  ստանալու  համար մրցանակը: Ան իր շնորհակալական խօսքին մէջ ըսաւ, որ քսան Հնչակեան նահատակները, որոնք մահացան հարիւր  տարիներ առաջ, հասկցան կարեւորութիւնը, թէ ինչու համար կը պայքարէին եւ ունեցան քաջութիւնը դիմադարձելու մարդասպան բռնապետութեան: Ան նաեւ յայտարարեց, որ հպարտ է Գոնկրէսէն ներս ներկայացնելով ընտրաշրջաննի  հայ բնակիչները եւ խոստացաւ կրկնապատկել իր ջանքերըª Հայկական Ցեղասպանութեան ճանաչման ուղղութեամբ:

Բեմ հրաւիրուեցաւ Արեւմտեան Ամերիկայի Թեմի Առաջնորդ Յովնան Արք. Տէրտէրեան: Սրբազան հայրը իր սրտի խօսքին մէջ ըսաւ,- ՚Հայոց  Ցեղասպանութեան 100-ամեակի  ոգեկոչման հանդիսութիւններու  ծիրէն ներս, քսան կախաղաններու անունը կրող յուշահանդէսը մեզ կը տանի դէպի անցեալը եւ գալիքը: Անցեալը ներկային մէջ կÿարձագանքէ եւ կը լուսաւորէ իւրաքանչիւրի կեանքը նահատակութեան ոգիով վասն Յիսուսի եւ վասն հայրենեաց, իսկ գալիքըª վաղուան արշալոյսի ճարտարապետները դառնալու գիտակցութիւնը կÿարթնցնէ մեր մէջՙ:

՚Հայու ազատատենչ ոգիին մարմնացումն են քսան քաջամարտիկ հայորդիք, ովքեր հաւատքի ոգով ու հայրենական տեսիլքով կամաւորաբար մահուան հետ հաշտութիւն են կնքած, որպէսզի խոնարհին մեր նախնեաց  սրբութեանց առջեւՙ, իր խօսքին մէջ շեշտեց սրբազան հայրը:

20-hatsbanyanՕրուայ գլխաւոր բանախօսն էր նախկին թրքահպատակ, Արցախեան  պատերազմի  ազատամարտիկ, 2008 թուականի համաժողովրդական շարժումի մասնակից եւ ապա քաղաքական բանտարկեալ, հասարակական գործիչ եւ հրապարակախօս Սարգիս Հացպանեան:

Բանախօսը իր ելոյթին մէջ նախ ներկայացուց Քսաններու գաղափարախօսութիւնը եւ դերը, ոչ միայն հայոց պատմութեան նաեւ, այլ փոքրամասնութիւններու իրաւունքներու պաշտպանութեան գծով: Ան անդրադարձաւ Թուրքիոյ մէջ վերջին տարիներուն տեղի ունեցող Քսաններու  տարելիցի  միջոցառումներուն, անոնց մասին հրապարակուող  գրականութեան եւ վաւերագրական ժապաւէններուն: Ան վստահեցուց որ պիտի գայ օրը,  երբ նոյն ինքն Սուլթան Պայազիտ հրապարակին վրայ, ուր անոնք կախաղան բարձրացած էին, պիտի կանգնուի անոնց յուշարձանը:

Բանախօսը անդրադարձաւ նաեւ այսօրուայ Հայաստանի հանրապետութեան  դիմագրաւած տագնապներուն: Խօսելով արտագաղթի մասին ան յայտարարեց,-՚Ժողովուրդը Հայաստանէն  չէ որ կը փախչի, այլ կը փախչի իշխանութիւնը զաւթած օլիկարխներէնՙ:

ՍԴՀԿ  Արեւմտեան Ամերիկայի Վարիչ Մարմինի ատենապետ Գաբրիէլ Մոլոյեան հրաւիրուեցաւ բեմ, հանգամանօրէն ներկայացնելու Կուսակցութեան  Կեդրոնական  Վարչութեան Ատենապետ Ընկ. Յակոբ Տիգրանեանը: Ընկեր Մոլոյեան իր կարգին ոգեկոչեց Քսաններու նահատակութեան իմաստը ու կոչ ըրաւ նոր սերունդինª քալելու անոնց ուղղիէն: Ան շնորհակալութիւն յայտնեց օրուայ գլխաւոր բանախօս Սարգիս Հացպանեանին եւ բոլոր խօսք առնողներուն:

Ներկայացնելէ  ետք  Ընկ. Տիգրանեանի կենսագրական հակիրճ գծերը հրաւիրեց զինք տալու իր պատգամը:

20-dikranian-2՚100   Տարիներ  առաջ  այս օրերուն  Պոլսոյ Սուլթան Պայազիտ հրապարակին վրայ  կախաղան կը բարձրացուէին Հնչակեան կուսակցութեան ամէնէն նուիրեալ գործիչները: Հայ ժողովուրդի բնաջնջման ճիւաղային ծրագիրը մտայղացող եւ իրականացնող Իթթիհատի պարագլուխները վստահ էին, որ կախաղան բարձրացնելով մեր 20  հերոսները անոնք վերացուցած կ’ըլլային իրենց կեանքին սպառնացող անմիջական վտանգը: Սակայն ինչպէս գիտենք, անոնք վերջ ի վերջոյ պիտի չկարողանային խուսափիլ հայ վրիժառուներու արդար դատաստանէնՙ, ըսաւ Կուսակցութեան ատենապետը:

Շարունակելով Ընկ Տիգրանեան ըսաւ,- ՚Գիտենք, նաեւ, որ մեր նահատակներուն  բացած ուղին շարունակուեցաւ  եւ ուռճանալով ոչ միայն զոհողութիւններու, այլ նաեւ ուխտի վերանորոգման  ճանապարհ  դարձաւ: Եւ այսօր երբ Մայր  կուսակցութիւնը իր տարբեր կառոյցներով,  սփիւռքի եւ Հայրենիքի մէջ տարածուած մարմիններով կը նշէ Փարամազի եւ իր ընկերներուն  նահատակութեան 100րդ տարելիցը կուգանք յիշեցնելու, որ քսաններու նահատակութիւնը  եղաւ ու կը մնայ  մեզի համար  նոր  արիւն ներարկող պատմական  աւանդՙ:

Ընկեր Տիգրանեան յայտարարեց որ,  շուտով Կուսակցութիւնը  Թուրքիոյ պատկան մարմիններուն պաշտօնական պահանջագիր պիտի ներկայացնենք, նախ յայտնաբերելու եւ ապա  յանձնելու  Հնչակեան քսան հերոսներուն աճիւնները: ՚Քսաններու  վերադարձը  եւ  անոնց ազգային թաղումը   Եռաբլուրի մէջ մեզի համար բարոյական եւ սկզբունքային խնդիր է… Հետեւաբար կը  վստահեցնեմ, որ  վճռական  ենք ու պիտի հետեւողական ըլլանք  մինչեւ որ, Քսանները  վերադառնան եւ հանգիստ ննջեն իրենց  երազած`  “Հոն արեւելքի հորիզոնին վրայ հիմնուած Ազատ Ու Անկախ  Հայաստանի մէ”ՙ, շեշտեց ընկերը:

Երեկոյի ընթացքին գործադրուեցաւ  տպաւորիչ գեղարուեստական յայտագիր մը, ազգային ու հայրենասիրական երգերով, ասմունքներով ու պարերով ճոխացած:

Մէջընդմէջ  ելոյթներ ունեցան ՚Սիփանՙ երգչախումբը, գեղարուեստական ղեկավարութեամբ Հենրիկ Անասեանի, Նոր Սերունդ Մշակութային Միութեան պարախումբը, ասմունքող  Նունէ Աւետիսեանը, երգիչներ Առնօ Մկրտչեանը, Սալբի Մայիլեանը եւ Յակոբ Յակոբեանը:

Խանդավառ մթնոլորտի մէջ  հնչեցին ՚Կռունկըՙ, ՚Կեցցէ Զէյթունըՙ, ՚Զարթի Լաոնՙ, ՚Ատանանՙ, ՚Ողջոյն Քեզ Հնչակըՙ, ՚Հզօր Հայաստանըՙ, հանդիսութիւնը փակելով ՚Տուր Ձեռքդ Ընկերՙ  Հնչակեան քայլերգով:

0 Comments

Leave a reply

Your email address will not be published. Required fields are marked *

*

CONTACT US

We're not around right now. But you can send us an email and we'll get back to you, asap.

Sending

©2021 SDHP

Log in with your credentials

Forgot your details?