Լիբանանահայերու ողջոյնը` Հնչակեան Քսան Անմահներուն

«Դուք միայն մեր մարմինները կրնաք կախել, իսկ մեր գաղափարը` ոչ»: Անմահ Քսաններու առաջնորդ Փարամազի սոյն վերջին խօսքերը, Հինգշաբթի Յունիս 18-ին, վերստին հնչեցին այս անգամ` լիբանանեան հրապարակի վրայ, Պոլսոյ Սուլթան Պայազիտ հրապարակին վրայ Հնչակեան ղեկավարներու կախաղան բարձրանալէն հարիւր տարի ետք: Կազմակերպութեամբ Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ Մարմինին, հովանաւորութեամբ ՍԴՀԿ Կեդրոնական Վարչութեան, երէկ երեկոյեան Պէյրութի Forum De Beyrouth համալիրին մէջ տեղի ունեցաւ Հնչակեան Քսան Կախաղաններու նահատակութեան հարիւրամեակի պաշտօնական նշում:

Ոգեկոչման հանդիսութեան ներկայ էին Լիբանանի հայոց թեմի առաջնորդ Շահէ Եպս. Փանոսեան, Մերձաւոր Արեւելքի Հայ Աւետարանական Եկեղեցիներու Միութեան Կեդրոնական Վարչութեան ատենապետ վեր. Ռաֆֆի Մսըրլեան, Տանն Կիլիկիոյ Կաթողիկէ Հայոց Ներսէս Պետրոս ԺԹ. պատրիարքի ներկայացուցիչ հայր Վարդան վարդապետ Գազանճեան, պատրիարքական փոխանորդ հայր Գաբրիէլ թագադիր ծայր. Վարդապետ Մուրատեանի ներկայացուցիչ հայր Եղիա վարդապետ Դերձակեան, Պէյրութի մօտ Հայաստանի Հանրապետութեան դեսպան Աշոտ Քոչարեան եւ հիւպատոս Աշոտ Վարդանեան, ՍԴՀԿ Կեդրոնական Վարչութեան փոխ ատենապետ պետական երեսփոխան Ընկ. Սեպուհ Գալփաքեան, ՍԴՀԿ Լիբանանի շրջանի Վարիչ Մարմինի ատենապետ Ընկ. Ալեքսան Քէօշկէրեան եւ անդամներ, ՌԱԿ-ի ներկայացուցիչ Յակոբ Փափազեան, ՀՅԴ-ի ներկայացուցիչ Աւետիս Կիտանեան, պետական երեսփոխաններ Ժան Օղասապեան, Սերժ Թուրսարգիսեան եւ Շանթ Չինչինեան, նախկին նախարար Աբրահամ Տէտէեան, Հայոց Ցեղասպանութեան հարիւրամեակի ոգեկոչման Լիբանանի Կեդրոնական Մարմինի ատենապետ Սեդա Խտըշեան, Պէյրութի քաղաքապետութեան անդամ եւ ՀԿԲՄ-ի ատենապետ Արամ Մալեան, ՀՄՄ Պէյրութի ատենապետ Ռաֆֆի Մալեան, կուսակցական, միութենական հոգեւորական, մարզական եւ գաղութային ներկայացուցիչներ:

Լիբանանի, Հայաստանի եւ ՍԴՀԿ-ի քայլերգներու ունկնդրութենէն ետք, հանրածանօթ ասմունքող Ընկ.հի Անի Եփրեմեան բեմ բարձրացաւ ՙՊայազիտ՚ ասմունքով` նուիրուած Քսաններու նահատակութեան:

ՍԴՀԿ Լիբանանի շրջանի վարիչ մարմինի ատենապետ Ընկ. Ալեքսան Քէօշկէրեան իր արտասանած խօսքին մէջ նկատել տուաւ, որ Քսաններու յիշատակի ոգեկոչումները վերջին տարիներուն դուրս եկած են իրենց կուսակցական եւ հայկական սահմաններէն հասնելով մինչեւ Թուրքիա, ուր Փարամազները դարձած են Օսմանեան Կայսրութեան տարածքին վրայ պայքար մղած բոլոր փոքրամասնութիւններու խորհրդանիշները: Անոր համաձայն, Փարամազի անունը դարձած է յետադիմութեան եւ կրօնական ծայրայեղականութեան դէմ տարուող պայքարի խորհրդանիշը, ժողովուրդներու ազգային ազատագրական պայքարը ներշնջող տիպար մը: Յիշեցնելով, որ Սուրիոյ եւ Թուրքիոյ սահմանային Քոպանի-Այն Արապ աւանին մէջ կռուող քիւրտերէն մէկը որպէս մարտական անուն ընտրած էր Փարամազի անունը, Ընկ. Քէօշկէրեան ըսաւ. ՙՕրեր առաջ Թուրքիոյ մէջ տեղի ունեցան օրէնսդրական ընտրութիւններ, որպէս արդիւնք երեք հայեր ընտրուեցան խորհրդարանի անդամ, այս երեքին մէջէն մեր համակրանքը եւ շնորհաւորութիւնները առաջին հերթին կþերթան Ժողովուրդներու Դեմոկրատական Կուսակցութեան անդամ բարեկամ Կարօ Փայլանին, իսկ մնացեալ երկու երեսփոխաններուն հանդէպ մեր դիրքը կþորոշենք իրենց ապագայ գործունէութեան հիման վրայ՚:

Ընկ. Քէօշկէրեան նշեց, որ Ժողովուրդներու Դեմոկրատական Կուսակցութեան համահիմնադիրներէն Փարամազի մասին գիրք հեղինակած Քատիր Աքին մատնանշած է, թէ հարիւր տարի առաջ Փարամազի դատավարութեան ընթացքին հնչած դիրքորոշումները եւ պահանջքները տակաւին այսօր եւս Թուրքիոյ մէջ կը ներկայացուին որպէս ընկերվարականներու պահանջքներ: ՙՄեր ազգային քաղաքական ասպարէզին վրայ աշխատանքային նոր դաշտ մը բացուած է, այս դաշտին վրայ գործելը վտանգաւոր է, զգուշաւոր եւ անակնկալներով լեցուն: Հակառակորդ կողմը գորշ գայլերն են, կրօնական ծայրայեղականները, Իթթիհատականներու ժառանգորդները, խունտայականները, մէկ խօսքով մեր իրաւունքները ժխտողներու վոհմակը եւ ամբողջ յետադիմական ուժերը: Այս բոլորին դիմացի խմբաւորումին մէջ կը գտնուին հողին կառչած յառաջադէմ ուժերու շարքերուն մէջ պայքարող բուռ մը մեր ազգակիցները, մեր բարոյական պարտքը պետք է ըլլայ անոնց կողքին կանգնիլը եւ ձեռք մեկնելը` Ցեղասպանութիւնը ճանչցած, մեր բնական դաշնակիցներուն, ժողովուրդներու հաւասարութեան հաւատացող, խաղաղասէր, աշխատաւորին վաստակը պաշտպանող, բնապահպան եւ քաղաքական յեղաշրջումին մասնակցած բոլոր յառաջադիմական ուժերուն՚, հաստատեց Վարիչ Մարմինի ատենապետը:

Ընկ. Քէօշկէրեան ապա խօսեցաւ շրջանային զարգացումներուն, Սուրիոյ եւ Իրաքի հակամարտութիւններուն, տեղահանութեան, համատարած կործանումին, վայրագութիւններուն եւ մարդկային ողբերգութեան մասին: ՙՍուրիոյ բնակչութեան կողքին մեծ վնաս կրեց նաեւ Սուրիոյ բարգաւաճ հայկական գաղութը, ծայրայեղականներու գրոհներուն թիրախ դարձաւ Քեսապը, դիտաւորեալ քանդուեցան հայկական կառոյցներն ու յատկապէս Տէր Զօրի Հայոց Ցեղասպանութեան զոհերու յիշատակին նուիրուած Սրբոց Նահատակաց եկեղեցին եւ յուշահամալիրը: Մեր ցանկութիւնն է, որ Սուրիոյ ճգնաժամը վերջ գտնէ մէկ վայրկեան առաջ, վերջ գտնեն արիւնահեղութիւնն ու մարդկային ողբերգութիւնը: Այսպիսի արհաւիրքներու ժամանակ միշտ առաւելագոյնս կը տուժեն ժողովրդային խաւերը, որոնք զոհ կþերթան մեծ տէրութիւններու տնտեսական եւ քաղաքական շահերուն: Սուրիոյ մէջ տեղի ունեցած խառնաշփոթ վիճակը ուղղակիօրէն կþազդէ Լիբանանի վրայ, ապակայունացնելով քաղաքական եւ ապահովական վիճակը, ինչպէս նաեւ պատճառելով տնտեսական մեծ վնաս եւ ընկերային լուրջ խնդիրներ, Լիբանան ապաստանած հարիւր հազարաւոր գաղթականներու եւ փախստականներու պատճառով՚, նշեց Ընկ. Քէօշկէրեան:

Անոր համաձայն, Հնչակեան Կուսակցութիւնը վերստին կը պահանջէ երկիրը դուրս բերել իր ծանր կացութենէն եւ քաղաքական բոլոր կողմերուն կոչ կþուղղէ անյապաղ ընտրելու նոր նախագահը, համախմբուելու երկրի օրէնսդրական հաստատութիւններուն շուրջ, երկրի պաշտպանութիւնը վստահելու միայն ու միայն լիբանանեան բանակին ու ներքին ապահովութեան ուժերուն: Վարիչ Մարմնի ատենապետը մերժեց ծայրայեղութիւնն ու կրօնական մոլեռանդութիւնը: ՙԻսկ ինչ կը վերաբերի Լիբանանի մէջ մեր ներազգային յարաբերութիւններուն, պաշտօնապէս կը յայտարարենք, որ մեր ռազմավարութիւնը եղած է եւ պիտի մնայ գաղութիս միասնականութիւնը եւ միակամութիւնը: Ասոնք լոկ կարգախօսներ չեն, այլ գործով ապացուցուած իրականութիւններ: Քաղաքական տարակարծութիւնները բնական դեմոկրատական երեւոյթներ են, սակայն երբեք պատճառ պէտք չէ դառնան երկպառակտումի, ատելութեան կամ սուր հակամարտութեան, մանաւանդ այսքան լուրջ եւ վտանգաւոր պահին, երբ մեր թշնամին ներթափանցած է ամէն տեղ: Մենք իրաւունք չունինք ներքին ճղճիմ հարցերով մեր ուժերը սպառելու եւ ժամանակ կորսնցնելու: Հազար ու մէկ տեսակ ծառացած խնդիրներ կան մեր գաղութին առջեւը, խնդիրներ որոնք պայմաններու բերումով օրէ օր աւելի կը բարդանան եւ լուծումները կը դժուարացնեն՚, եզրափակեց Ընկ. Ալեքսան Քէօշկէրեան:

Հանդիսութեան ընթացքին առաջին անգամ ըլլալով ցուցադրուեցաւ ՙԼուսաբաց՚ վաւերագրական ժապաւէնը, որ մշակուած է յատուկ Քսաններու նահատակութեան հարիւրամեակին առթիւ: Մօտ կէս ժամ երկարող ժապաւէնին մէջ կը ներկայացուին Քսաններու նահատակութեան նախորդած հանգրուանը, դատավարութիւններու ընթացքը եւ ղեկավարներու նահատակութիւնը:

Lebanon-djaniguianՀայրենի վիպագիր եւ լրագրող Գագիկ Ճանիկեան իր ուղերձը սկսաւ ներկայացնելով իր տպաւորութիւնները` Ապրիլ 24-ին Պոլսոյ մէջ կազմակերպուած ձեռնարկներէն: Անոր խօսքով, Սուլթան Պայազիկ հրապարակը լեցուած էր զինուորականներով, գաղտնի ոստիկաններով եւ լրագրողներով: ՙԵս մասնակցեցայ Ապրիլ 24-ի ոգեկոչման բոլոր սգերթներուն, սակայն ոչ մէկ տեղ, նոյնիսկ Թաքսիմ հրապարակին վրայ նման խստութիւն չտեսայ: Եւ ես համոզուեցայ, որ քսաններուն կախաղան բարձրանալէն 100 տարի ետք իսկ Թուրքիոյ իշխանութիւնները կը վախնան Հնչակեան կուսակցութենէն՚, նշեց Ճանիկեան: Խօսելով Քսաններու եւ Հնչակեան այլ հերոսներու դատավարութիւններուն մասին Ճանիկեան նշեց, որ այդ նիստերուն նպատակն էր հաւատացնել թուրքին եւ միջազգային ընթերցողին, որ հնչակեանները անջատողականներ, դաւադիրներ եւ խռովարարներ եղած են, ահաբեկչական խումբ կազմած են, որպէսզի սպաննեն իթթիհատական կառավարութեան պարագլուխներուն: Ներկայացնելով դրուագներ` Քսաններու դատավարութենէն, անոր մէկ շաբաթով յետաձգումէն, Փարամազի պաշտպանական ճառէն, Ճանիկեան եզրակացուց, որ դատավարութեան հեղինակն ու բեմադրիչը Թալեաթն էր: ՙԱն առանձնապէս վտանգաւոր յանցագործ կը համարէր Փարամազին, որ ռուսահպատակ ըլլալով հանդերձ հասած էր Պոլիս, հաւաքագրած էր խումբ մը անիշխանականներու եւ կ’ուզէր կործանել Օսմանեան Կայսրութիւնը: Դատարանը կատարեց ներքին գործոց նախարարին հրամանը` առանց իրաւաբանական հիմնաւորումի, տարբերութիւն չդնելով Փարամազին եւ սրճեփ Գառնիկ Պոյաճեանի միջեւ, քսանին ալ մահուան դատապարտեց՚, ըսաւ Ճանիկեան:

Ան ապա խօսեցաւ Վան գործողութեան մասին, ներկայացուց գործողութիւնը իրականացնողներուն նպատակները եւ յայտարարութիւնը եւ նշեց, որ գործողութեան հեղինակներէն Գէորգ Կիւզէլեան յետագային Արցախի մէջ կազմաւորեց Մեծն Մուրատ ջոկատը: ՙՄեծն Մուրատը Հնչակեան միակ ջոկատը չէր, որ կը մարտնչէր Արցախի ազատագրութեան, Հայաստանի պետականութեան վերականգնումին համար: Արցախի մէջ ահ ու սարսափ կը սփռէր նաեւ Չելլօ ասպատախումբը, իսկ Մեղրիի սահմանները կը պաշտպանէր Փարամազ ջոկատը: 1915-ի Յունիս 15-ին Պոլսոյ Սուլթան Պայազիտ հրապարակին վրայ կախաղան բարձրացած Քսան Հնչակեաններէն միայն Փարամազը արեւելահայ էր: Հայաստանի պետականութեան վերականգնումէն ետք ան իր ծննդավայրը վերադարձաւ, որպէս արձան կանգնեցաւ քաղաքի կեդրոնին: Փարամազը առանձին չէր, անոր շուրջը այն 19 երդուեալ Հնչակեաններու յուշարձաններն են, որոնք տուն` ազատագրուած Արեւմտահայաստան վերադառնալու կը սպասեն: Կը սպասեն ու կը հաւատան, որ անպայման պիտի վերադառնան՚, եզրափակեց վիպագիր Գրիգոր Ճանիկեան:

Ազգային ու յեղափոխական երգերու փունջով մը հանդէս եկաւ հայրենի երգիչ Յարութ Մուրատեանը:

Lebanon-sebouh-kalpakianՍԴՀԿ Կեդրոնական Վարչութեան փոխ ատենապետ, պետական երեսփոխան Ընկ. Սեպուհ Գալփաքեան իր ուղերձը սկսաւ վերյիշեցնելով Հայոց ցեղասպանութեան հարիւրամեակի ՙկը յիշենք ու կը պահանջենք՚ լոզունգը: ՙԹուրքը, իր ընդվըզումն ու մտահոգութիւնը առաջուան պէս եւ առաջին անգամ ըլլալով չկրցաւ թաքցնել: Պոռթկաց, սպառնաց ու յոխորտաց` բացայայտելով իր քաղաքական միտքին ողջ սնանակութիւնը: Դեսպաններ տուն կանչեց եւ ծախսուած միլիոնաւոր տոլարները ջուրը ինկան, որովհետեւ ան ձախողեցաւ լռեցնել, կամ դոյզն անգամ մեղմացնել մեր պահանջատիրութեան արդար ձայնը: Այս է թուրքին պատմութիւնը եւ ան այսօր անկիւն դրուած է, ճիշդ վիրաւոր գազանի մը նման, որ կամ տեղի պիտի տայ, կամ պիտի փորձէ կրկին յօշոտել: Սակայն, այս անգամ կրկին յօշոտելու բոլոր առիթները բացառուած են՚, ըսաւ Ընկ. Գալփաքեան: Անոր խօսքով, այսօր հայրենի իշխանութիւնները Սփիւռքի հետ համահաւասար յիշեց եւ պահանջեց բարձրագոյն մակարդակներով: ՙՄենք պէտք է բարձր գնահատենք այս իրողութիւնը, պետութիւն ունենալու հանգամանքը շատ աւելի լայն դռներ պիտի բանայ` ի լուծումն մեր անժամանցելի դատին: Այս 100-ամեակեան յաթանակը մենք ամէնէն առաջկը պարտինք մեր ժողովուրդին, ապա մեր քաղաքական ազգային կուսակցութիւններուն, ի մասնաւորի ՍԴՀ Կուսակցութեան, որոնք ամբողջ մէկ դար կրցան վառ պահել ազգային գիտակցութեան կրակը՚, հաստատեց պետական երեսփոխանը: Ան կոչ ուղղեց ՙկը յիշեմ եւ կը պահանջեմ՚ լոզունգը վերածելու պարզապէս ՙկը պահանջեմ՚-ի, որովհետեւ որպէս հայերը բազմիցս ապացուցեցինք, որ չենք կրնար մոռնալ մեր նահատակներուն յիշատակը:

Ընկ. Գալփաքեան դիտել տուաւ, որ թուրքին խաբէութեան փորձերը սպառած են, իսկ հայուն համբերութեան բաժակը` արդէն յորդած: Դիտել տալով, որ 80-ականներու գործելաոճը գուցէ այսօր նպատակայարմար չըլլայ, Ընկ. Գալփաքեան առաջարկեց աշխատանքային մարտավարութիւն մը որդեգրել: ՙԱռաջին, Թուրքիոյ ձեռքէն պէտք է խլուի այն վերջին խարխուլ պատրուակը, թէ իբր ան համաձայն է արժեւորելու եղերական ժամանակաշրջանը: Այսօր այդ երկրին ղեկավարները ջանք չեն խնայեր աշխարհին ցոյց տալու համար, թէ իբր մենք է, որ կը մերժենք բոլոր տեսակի քննարկումները: Այս կէտը կրնայ ի վնաս մեզի գործել եւ մենք պարտաւոր ենք արագ լուծում գտնել՚, ըսաւ ՍԴՀԿ Կեդրոնական Վարչութեան փոխ ատենապետը: Ան կարեւորեց Թուրքիոյ մէջ համախոհներ գտնելու աշխատանքները եւ կոչ ուղղեց գտնելու այն անհատներն ու կազմակերպութիւնները, որոնք արդարացի ճնշում կրնան գործադրել Թուրքիոյ ներքին հրապարակին վրայ, մանաւանդ վերջին ընտրութիւններէն ետք:

Ընկ. Գալփաքեան դիտել տուաւ, որ Հայոց Ցեղասպանութեան ճանաչման թղթածրարը դադրած է օրակարգային անհրաժեշտութիւն ըլլալէ, որովհետեւ շատ երկիրներ արդէն ճանչցած են փաստը, նոյնիսկ քրէական պատասխանատուութիւն սահմանելով ժխտողներուն դէմ: Անոր խօսքով, անհրաժեշտ է հայկական հարցը իրաւական հարթակ բարձրացնել: ՙՆախադէպը արդէն իսկ կայ, առաջինը` Կիլիկիոյ Կաթողիկոսութեան ներկայացուցած դատական հայցը հանդիսացաւ, Սիսի եկեղեցապատկան կալուածներու վերադարձի պահանջով: Առաջինը, բայց թոյլ չտանք, որ ըլլայ վերջինը: Օգտագործելով մեր ժողովուրդին անսպառ ներուժն ու քաղաքական կամքը` այս գործընթացը շարունակենք նաեւ միջազգային տարբեր ատեաններու ու դատարաններու մէջ այնքան, որ թուրքը, ի վերջոյ, ստիպուած ու պարտադրաբար յանձնուի: Մեր դարաւոր պայքարի այս հանգրուանին ամենաարդիւնաւէտ ձեւը առայժմ սա է՚, եզրակացուց Ընկ. Սեպուհ Գալփաքեան:

Ան կոչ ուղղեց մեր պահանջատիրութեան յստակ չափ եւ բնոյթ տալ, այլապէս թուրքը պիտի չմտածէ նոյնիսկ ընդունելու համար հատուցելու մասին: ՙԹղթածրարը պէտք է ամբողջանայ, կէտերը ամրագրուին եւ պահանջող կողմը պէտք է ունենայ լիազօրուած բանբեր: Առանց այս կէտերուն պահանջատիրութիւնը կը մնայ վերացական: Ուրեմն, այստեղ խիստ անհրաժէշտութիւն կը ծագի ստեղծել համընդհանուր ներկայացուցչութիւն մը, որուն հիմնական թիրախը պիտի ըլլայ կարգաւորել եւ պատրաստել մէկ ընդհանուր թղթածրար: Մեր առաջարկով, այդ մարմինը կրնայ ըլլալ արդէն իսկ կազմաւորուած եւ գործնականօրէն ինքզինք հաստատած Հայոց Ցեղասպանութեան հարիւրամեակի պետական մարմինը, գլխաւորութեամբ ՀՀ Նախագահ Սերժ Սարգսեանի, զոյգ կաթողիկոսներուն եւ աշխարհասփիւռ հայ ժողովուրդի ներկայացուցիչներուն՚, հաստատեց Ընկ. Գալփաքեան:

Իր ուղերձի աւարտին պետական երեսփոխանը նշեց, որ մեր նահատակները այսօր մեզմէ կը պահանջեն ըլլալ վճռակամ, անզիջող, անվախ ու ինքնավստահ: Մէջբերելով կախաղանի վրայ Փարամազի արտասանած խօսքերը, Ընկ. Սեպուհ Գալփաքեան ըսաւ. ՙայս խօսքերը լոկ մարգարէական կանխատեսում կամ իր ժողովուրդի լուսաւոր ապագայի հանդէպ ունեցած տեսլական ու նուիրում չէին: Այդ խօսքերը նաեւ հաւատոյ հանգանակ ու պատգամ էին`ուղղուած գալիք բոլոր սերունդներուն: Այսօր, անոնց պայծառ յիշատակի հարիւրամեակին օրը, մենք հպարտօրէն կրնանք արձանագրել, որ անցած 128 տարիներու ընթացքին Սոցիալ Դեմոկրատ Հնչակեան Կուսակցութիւնը, հակառակ աշխարհաքաղաքական բարդագոյն իրավիճակներու` բնաւ չշեղեցաւ այն ճշմարի՛տ ուղիէն, որ նախանշած ու մեզի պատգամած էին անմահ Քսանները: Հայրենիքը միշտ եղած է եւ այսօր ալ կը մնայ մեր գուրգուրանքին եւ մտահոգութեան կիզակէտը: Այսօր ալ` շուրջ 25 տարի Հայրենիքի անկախացումէն ետք, մեր զոյգ հանրապետութիւններուն սահմանային անվտանգութիւնը, անոնց տնտեսական բարգաւաճումը, մեր հայրենի ժողովուրդին հոգեւոր եւ մշակութային զարգացումը, մանաւանդ յանուն ընկերային արդարութեան մղուող եւ մղուելիք պայքարը` է ու պիտի մնայ մեր կուսակցութեան առաջնահերթութիւնը՚, եզրափակեց Ընկ. Գալփաքեան:

Իրենց երկար տարիներու բեղմնաւոր, անձնուէր եւ անխոնջ ծառայութիւններուն համար, ՍԴՀԿ Կեդրոնական Վարչութեան ՙՓարամազ՚ շքանշանով պարգեւատրուեցան Ընկ. Սարգիս Սարգիսեանը եւ յետ մահու` Ընկ. Պէպօ Սիմոնեանը: Վերջինիս ՙՓարամազ՚ շքանշանը ստանձնեց տիկին Ազատուհի Սիմոնեանը:

Forum De Beyrouth-ի մէջ կայացած Քսաններու յիշատակի ոգեկոչման հանդիսութիւնը եզրափակուեցաւ երգիչ Յարութ Մուրատեանի եւ ներկաներուն կատարողութեամբ` ՙՈւխտի Հրաւէր՚ երգով:

0 Comments

Leave a reply

Your email address will not be published. Required fields are marked *

*

CONTACT US

We're not around right now. But you can send us an email and we'll get back to you, asap.

Sending

©2021 SDHP

Log in with your credentials

Forgot your details?