Քսան Կախաղաններու ոգեկոչման հանդիսութիւն Նիկոսիոյ մէջ

Cyprus-1

Շաբաթ, 20 Յունիս 2015-ի երեկոյեան ժամը 7:00-ին, կազմակերպութեամբ Ս.Դ.Հ.Կ. Կիպրոսի Վարիչ Մարմինին, Նիկոսիոյ ՀԲԸՄ-ի ակումբին Գըրպըյըքեան սրահին մէջ տեղի ունեցաւ Հնչակեան Քսան Կախաղաններու նահատակութեան 100-րդ տարելիցին նուիրուած հանդիսութիւնը: Հանդիսութեան ներկայ էին կիպրահայ համայնքի պետական ներկայացուցիչ պրն. Վարդգէս Մահտեսեան, քահանայ հայրեր, Կիպրոսի մօտ Պանկլատէշի հիւպատոս Ռուբէն Գալայճեան, Ազգային Երեսփոխանական եւ Վարչական Ժողովներու ատենապետները, ՀՅԴ-ի եւ ՌԱԿ-ի ներկայացուցիչներ, ՀԲԸՄ-ի պատասխանատուներ, Նարեկ հայկական վարժարաններու հոգաբարձութեան ատենապետն ու վարժարանին տնօրէնուհին, կեպրահայութեան մուխթարը, «Կիպրահայեր», «Արձագանգ», եւ «Ազատ Խօսք» լրատուական միջոցներու խմբագիրներ, ՀՄԸՄ-ի, Համազգայինի ներկայացուցիչներ, կիպրահայ հայորդիներ ու համակիրներ: Օրուան պատգամախօսն էր հայրենի գրող, հրապարակախօս ու թարգմանիչ Գրիգոր Ճանիկեան:

Կիպրոսի ու Հայաստանի հանրապետութիւններուն եւ Ս.Դ.Հ.Կ.-ի քայլերգներէն ետք, ձեռնարկին բացման խօսքը յանուն կազմակերպիչ մարմինին կատարեց Ս.Դ.Հ.Կ. Կիպրոսի Վարիչ Մարմնի ատենապետ ընկ. Աւետիս Փոշօղլեան: Ան նշեց, թէ «կը յիշեմ եւ կը պահանջեմ» կարգախօսը ճիշդ ընկալելու համար, նախ պէտք է մեծարել հերոսները՝ որոնք զոհաբերուեցան՝ իրենց հատու հայեացքը ուղղած ազատ ու անկախ Հայաստանին. ան յարեց, թէ Հայկական Ցեղասպանութեան սրբացած նահատակներուն մէջ ամենասուրբ անձերը ֆետայիներն են՝ ո՛ր կուսակցութեան կամ դաւանանքին ալ պատկանին անոնք: Ան անդրադառնալով կիպրահայ իրականութեան եւ սրահէն ներս բազմաբնոյթ ներկայութեան, ընդգծեց թէ հաւաքական ճիգերով կարելի է յաղթանակներ արձանագրել, ոեւէ հայորդիի պէտք չէ մեկուսացնել կամ չէզոքացնել, իրաւունք չունինք կորսնցնելու ոեւէ հայ մեր հաւաքական կեանքէն: Ապա ան օրուան պատգամախօս հայրենի հիւրին ընդմէջէն ողջունեց հայրենի պետութիւնը, ժողովուրդն ու մտաւորականութիւնը, հաստատելով որ կիպրահայութիւնը ապահով եւ հարազատ ասպնջական կղզիի վրայ է, կը վայելէ Կիպրոսի ժողովուրդին ու ղեկավարութեան ամբողջական զօրակցութիւնը. ան ողջունեց Կիպրոսի ղեկավարութեան դիրքորոշումը Հայկական Ցեղասպանութեան հարցին, մատնանշելով որ Կիպրոս եւ Հայաստան ռազմավարական եւ աշխարհաքաղաքական դաշնակիցներ են միեւնոյն նախայարձակ թշնամիին դէմ:

Ապա ներկաներ հետեւեցան «Քսանի Լուսաբացը» տեսաերիզին, ուր պատմական անցեալը կար Քսաններու սխրագործութեան, Հնչակեան Կուսակցութեան ծրագիրին, Կոստանցայի 7-րդ համագումարին, Փարամազի գործունէութեան, մատնութեան նենգ արարքին, քսան նահատակներու կենսագրութեանց եւ այլն (տեսաերիզը պատրաստուած էր ընկ. Եղիկ Ճէրէճեանի եւ Գրիգոր Ճանիկեանի կողմէ):

Այնուհետեւ խօսք առաւ օրուան պատգամաբերը, որ նշելէ ետք թէ տեսաերիզը Հայաստանի Գիտութիւններու Ազգային Ակադեմիային մէջ դիտուելէ ետք յոտնկայս արժանացած է ծափողջոյններու, ներկաներ նոյնպիսի ջերմեռանդութեամբ արձագանգեցին առաջարկին: Ան ընդգծեց, թէ ինք այս պահուս ո՛չ գրող է եւ ո՛չ ալ թարգմանիչ, այլ հայկական զոյգ անկախ հանրապետութեանց ներկայացուցիչ: Որմէ ետք անդրադառնալով Քսաններուն դատավարութեան եւ Իթթիհատի պարագլուխ Թալաաթ փաշայի ցուցմունքներուն, մատնանշեց, թէ Իթթիհատ իսկապէս ահաբեկուած էր հնչակեաններէն եւ ամէն գնով կ’ուզէր պատժել հնչակեան խիզախ որոշումը, ինչ որ արտայայտուեցաւ շինծու դատավարութեամբ եւ կախաղանումով: Ան յայտնեց թէ ուսումնասիրած է Քսաններուն դատավարութեան ընթացքը, արխիւներէ բացայայտած բազմաթիւ նորութիւններ մեր ժողովուրդը շահագրգռող: Յիշեցնելէ ետք թէ 1981-ի Փարիզի Վան գործողութեան հերոսներէն երկուքը հնչակեաններ էին, հաստատեց թէ հնչակեան գաղափարախօսութիւնը իր ազատագրական ոգիով ու պայքարով եղած է ներշնչման աղբիւր նաեւ նոր սերունդներուն համար, որու որպէս արդիւնք արցախեան թէժ մարտերուն գոյացան Փարամազ, Մեծն Մուրատ ջոկատները. ան անդրադարձաւ Մեղրիի մէջ Փարամազի արձանին տեղադրման, անոր 19 ընկերներուն յուշաքարերուն՝ որոնք պիտի որպէս արձան կոթողուին ազատագրուած հայկական հողերուն վրայ՝ իրենց բնօրրաններուն մէջ: Ան յիշեցուց Չելլօ ջոկատին հետախուզական յանդուգն արարքները Ղարաբաղի մէջ, ինչ որ դրական հետեւանքներ ունեցած է պատերազմին արդիւնքին վրայ. ան նշեց թէ հնչակեան ջոկատներ յաղթական էին՝ քիչ զոհերով: Իրեն յատուկ ոգեւորութեամբ Գր. Ճանիկեան հաստատեց թէ ազատագրուած Շուշիի բերդէն ինք կը տեսնէ վաղուան ազատագրուելիք հողերը Արեւմտեան Հայաստանի տարածքին: Ան կոչ ըրաւ մնալու կառչած Քսաններու կտակին եւ հայ ազատագրական պայքարի աւանդոյթներուն: Անոր խօսքերը մի քանի անգամ ընդմիջուեցան որոտընդոստ ծափահարութիւններով:

Որմէ ետք «Պիտի Գնանք Վաղ Թէ Ուշ» երգով հանդէս եկաւ Գէորգ Շահպազեան: Իսկ բարեպատեհ զուգադիպութեամբ Կիպրոս գտնուող յունահայ սիրուած երգիչ Սարօ Տեմիրճեան (նախկին լիբանանահայ) հանդէս եկաւ մի քանի ազգային-հայրենասիրական երգերով: Ան յայտնեց թէ ինք այս հայրենաշունչ երգերը կը նուիրէ իր մեծ հայրերուն յիշատակին, որոնք եղած են հաւատաւոր հնչակեաններ: Անոր ելոյթը ընդունուեցաւ խանդավառ տրամադրութեամբ:

Ոգեւորիչ հանդիսութիւնը իր աւարտին հասաւ Տէր Մոմիկ քնյ. Հապէշեանի Պահպանիչով:

Cyprus-2Կիրակի, 21 Յունիսին, Նիկոսիոյ Սուրբ Աստուածածին եկեղեցւոյ մէջ տեղի ունեցաւ հոգեհանգստեան պաշտօն ի յիշատակ Հնչակեան Քսան Կախաղաններուն: Պատարագիչ քահանայ հայրը՝ Տէր Մոմիկ Հապէշեան իր քարոզին բնաբան ընտրելով Մատթէոս Աւետարանէն հատուած մը՝ Քրիստոսի հանդէպ կասկածամտութեան՝ փարիսեցիներու կողմէ, զուգահեռ կատարեց Քսաններուն, որոնց նկատմամբ կար թերահաւատութիւն, մարդիկ չլսեցին անոնց մարգարէական զգուշացումները եւ յանիրաւի մեղադրեցին զանոնք. ան հաստատեց թէ պէտք է վառ պահել հերոսներուն յիշատակը, հաղորդուիլ անոնց կտակով եւ հետեւիլ նահատակներու հայրենասիրական ուղիին՝ հակառակ համատարած անտարբերութեան եւ անտեղի տարակուսանքներու՝ որոնք մերօրեայ փարիսեցիներ են ազգին առոյգ ոգին խաթարող: Պատարագին ներկայ էին Ս.Դ.Հ.Կ. Կիպրոսի Վարիչ Մարմնի ընկերներ եւ տէր եւ տիկ. Գրիգոր ճանիկեան:

Սուրբ եւ Անմահ Պատարագէն ետք, ընկերներ մէկ րոպէ լռութեամբ յարգելէ ետք Քսաններուն յիշատակը՝ ծաղկեպսակ զետեղեցին եկեղեցւոյ բակը գտնուող Մեծ Եղեռնի յուշակոթողին առջեւ:

0 Comments

Leave a reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

CONTACT US

We're not around right now. But you can send us an email and we'll get back to you, asap.

Sending

©2017 SDHP

Log in with your credentials

Forgot your details?