Քսան Կախաղաններու 100 ամեակի ոգեկոչումը Փարիզի մէջ

Paris-khmpain

Կիրակի, Յուլիս 5, 2015ի յետմիջօրէին, Փարիզի Առաջնորդանիստ, Սուրբ Յովհաննէս Մկրտիչ տաճարին կից Նուրհան Ֆրենկեան սրահին մէջ, տեղի ունեցաւ Հնչակեան Քսան Կախաղաններու 100 ամեակի ոգեկոչումը: Սոցիալ Դեմոկրատ Հնչակեան Կուսակցութեան Վարիչ Մարմինի հրաւէիրով, հասարակութիւնը եկած էր դիտելու այն վաւերագրական տեսերիզը, «Քսանի Լուսաբացը» որ պատրաստուած էր ՍԴՀԿի Կեդրոնական Վարչութեան պատուէրով, Շարժում մետիայի կողմէն: Որմէ ետք ՍԴՀԿի Կեդրոնական Վարչութեան ատենապետ, Յակոբ Տիգրանեան, պիտի փոխանցեր լսարանին, ՍԴՀԿի պատգամը:

Ոգեկոչումը սկսաւ ՍԴՀԿի Ֆրանսայի Շրջանի Վարիչ Մարմինի ատենապետ, Գէորգ Սաչլեանի ողջոյնի խօսքով: Ան հակիրճ պատմականը ըրաւ ՍԴՀԿի Է համագումարին, որ Սեպտեմբեր 1913ին, Ռումանիոյ Քոսթենճէ, Գոնսդանս, քաղաքին մէջ գումարուած կը որոշէ ահաբեկել Երիտասարդ Թուրքեր – Իթթիհատ կուսակցութեան պարագլուխները, Թալաթը, Էնվերը եւ Ճեմալը: Յիշեց, Փարամազի դերը այդ ահաբեկչական գործին նախապատրաստական աշխատանքներուն մէջ: Նկարագրեց Հնչակեան պարագլուխներու ձեռբակալումը, բանտարկումը, շտապ դատը եւ կախաղանը: Գէորգ Սաչլեան արտասանեց Փարամազի, «Դուք մեր մարմինները կրնաք կախել միայն, իսկ գաղափարը ոչ: Վաղը, արեւելքի հորիզոնին վրայ պիտի ողջունենք ազատ, անկախ եւ ընկերվարական Հայաստանը» եւ Տքթր Պեննէի, «Դուք մեզ Քսաններս կը կախէք, բայց գիտցած եղէք թէ քսան հազարներ պիտի գան մեր ետեւէն» նշանաւոր խօսքերը եւ զուգահեր մը ըրաւ այսօրուան կացութեան հետ, եւ վստահեցուց թէ, Հնչակեան Քսաններուն ետեւէն  եկած է Հնչակեան քսան հազարներու շարք մը ամենուրեք: Իսկ ՍԴՀԿը որ հայրենիքի մէջ կը տանի ընկերային արդարութեան եւ հաւասարութեան, գաղափարախօսութիւն եւ պայքար, շուտով կ’առաջարկէ Հայաստանի անկախ պետութեան, ընկերվարական եւ ժողովրդավար, սոցիալ-դեմոկրատ, համակարգ: Ան իր խօսքը աւարտեց հետեւեալ բառերով, «թող ամէն հայ հպարտ զգայ, որ ազգին ծոցէն ծնաւ ՍԴՀԿը, եւ քսանները, եւ ան կանգուն է ժողովուրդին եւ ազգային համայն շահերուն, ինչպէս միշտ»:

Բեմ հրաւիրուեցաւ Ֆրանսահայոց Առաջնորդ, Տէր Վահան Եպիսկոպոս Յովաննէսեան: Սրբազան Հայրը իր խօսքին մէջ դրուատեց ՍԴՀԿի դերը հայապահպանման եւ ազգապահպանման դժուրին աշխատանքին մէջ սփիւռքեան ափերուն վրայ: Բացատրեց Հնչակեան Քսաններու անձնուէր առաքելութիւնը, որոնք իրենց ազգին ներկան ու ապագան աւելի վեհ դասեցին քան իրենց կեանքը: Սրբազան Հայրը անդրադարցաւ ազգային եւ միջազգային հայկական կազմակերպութիւններու տարբերութեանը եւ աւելցուց, թէ Սոցիալ Դեմոկրատ Հնչակեան Կուսակցութեան պատմութիւնը կու գայ զայն դասելու իբր ազգային, որ մղուած է ազգին լինելութեան պայքարով:

Օրուան գլխաւոր բանխօսը, Սոցիալ Դեմոկրատ Հնչակեան Կուսակցութեան, Կեդրոնական Վարչութեան ատենապետ, Յակոբ Տիգրանեանը անդրադարցաւ ՍԴՀԿի վարած քաղաքականութեան Օսմանեան Կայսրութեան մէջ, ի մասնաւորի տիրող Իթթիհատական կուսակցութեան պարագլուխներուն հանդէպ: Ան իր խօսքին մէջ յայտարարեց, թէ ՍԴՀԿը իր Կեդրոական Վարչութեան գրասենեակը սփիւռքէն փոխադրեց Հայաստան: Աւելցուց, թէ պաշտօնական պահանջագիր ներկայացուած է Քսան կախաղաններու աճիւնները յայտնաբերել եւ զանոնք փոխադրել Ազատ Անկախ Հայաստան եւ զետեղել Եռաբլուրի Ազգային գերեզմանատան մէջ: Արտայայտուելով Ցեղասպանութեան 100 ամեակի մասին, ան առաջնահերթ նկատեց համազգային պահանջներու իրաւական թղթածրարի պատրաստումը: Բացատրեց, թէ ՍԴՀԿի համար առաջնային խնդիրներն են, Հայաստանի Հանրապետութեան հզօրացումն ու կայունութիւնը, սահմանադրական բարեփոխումներու գործընթացը, մենատիրականութեան եւ կաշառակերութեան դէմ պայքարը, Հայոց Ցեղասպանութեան ճանաչման աշխատանքները համահայկական հռչակագիրի դրոյթներով, նոր կամուրջներու հաստատումը Հայ-թրքական երկխօսութեան գործընթացին մէջ, Արցախի հանրապետութեան ամրապնդումը, ժողովուրդի անվտանգութիւնն ու ազատ ինքնորոշման իրաւունքը եւ միջազգային ճանաչումը, ամրապնդել Հայաստան-սփիւռք յարաբերութիւնները փոխադարձ վստահութեան մթնոլորտի ստեղծմամբ: Յակոբ Տիգրանեան իր խօսքը աւարտեց ըսելով, թէ ՍԴՀԿի ճանապարհը եղած է պայքարի եւ նահատակութեան ճանապարհ, եւ թէ Կուսակցութեան կամքը, ՍԴՀԿի հաւատամքը եւ Հնչակեանի արիւնը պատրաստ են գործելու յանուն մեր Երկրին, մեր Հայաստանին, որ մեր սիրտն է ու բոլոր ժամանակներու վեհագոյն արժէքը:

Երիտասարդ Վարդան Իշխանեան, խրախուսեց ներկաներուն, իր արժանավայել առոգանութեամբ զոյգ ասմունքներով, Յովհաննէս Թումանեանի «Հին Օրհնութիւն» եւ Գառնիկ Ադդարեանի «Պայազիտ»ով:

Ոգեկոչման աւարտին, ՍԴՀԿի Ֆրանսայի շրջանի երէց անդամներէն, Գաբրիէլ Քէշիշեանը, իր տարած աշխատանքին ու կուսակցական զոհաբերութեան առ ի արդիւնք, պատուուեցաւ ՍԴՀԿի Կեդրոնական Վարչութեան «Փարամազ» շքանշանով, ձեռամբը ատենապետին’ Յակոբ Տիգրանեանին:

Քսաններու Հաւատքով, Քսան Հազարներու խոստումով ներկաները ցրուեցան, պահ մը կանգ առնելով եւ խորհրդածելով Քսաններու նկարներուն առջեւ:

0 Comments

Leave a reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

CONTACT US

We're not around right now. But you can send us an email and we'll get back to you, asap.

Sending

©2017 SDHP

Log in with your credentials

Forgot your details?